BEREMBE NTAN TIANG PELUNGGUH JARI DENGAN ISLAM SAK KREATIF

بِسْمِ اللهِ الرَّحْمَنِ الرَّحِيْمِ, الحَمْدُ لِلَّهِ رب العلمين نَحْمَدُهُ وَ نَسْتَعِيْنُهُ وَنَسْتَغْفِرُهُ وَنَعُوْذُ بِاللَّهِ مِنْ شُرُوْرِ اَنْفُسِنَا وَمِنْ شَيِّئَاتِ اَعْمَالِنَا, مَنْ يَهْدِ اللَّهِ فَلاَمُضِلَّ لَهُ, وَمِنْ يُضْلِلْ فَلاَ هَا دِيَ لَهُ, أَشْهَدُ أَنْ لاَإِلَهَ إِلاَّاللَّهُ  وَحْدَهُ لاَشَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ, اَللَّهُمَّ صَلِّ وَسَلِّمْ عَلَى سَيِّدِنَا مُحَمَّدٍ صَلَى اللَّهُ عَلَيْهِ وَسَلَّمَ. وَعَلَى أَلِهِ وَصَحْبِهِ أَجْمَعِيْنَ.

Sak tiang hormati Bapak Kepale Madrasah

Sak tiang hormati endah Ustaz daet ustazah tiang lek MTsN Kediri

Sak tiang kangen semeton-semeton tiang siawa siswi MTsN Kediri

Alhamdulillahi robbil ‘alamin

Jari panjak Allah ta’ale lek bumi niki sanget te anjuran tiang pelungguh sami yak terus menerus panjatan syukur Alhamdulillah atas selapuk nikmat sak Allah kicanin jok tiang pelungguh sami, sengak berkat nikmat sehat daet luang waktu niki tiang pelungguh sami rauh lek acare sak berkah niki.

Shalawat daet salam nenten te lupak jok deside nabi Muhammad SAW, sengak berkat kegigihan beliau tiang pelungguh sami mauk nikmati sak aran iman islam daet ihsan niki, sak pesugul umat manusie elek dunie jahiliyyah jok dunie sak teridhoi sik deside Allah swt.

Lek ate sak paling dalem tiang sampean tampi asih jok pembawe acare sak beng tiang kesempatan pidato elek hadapan pelungguh sami. Tiang endah sampean tampi asih jok selapuk ustaz ustazah sak sabar bimbing tiang tuntut ilmu agame lek madrasah niki. Nenten tiang lupa’ endah tiang ucapan ampure sinampure lamun arak pembaosan tiang bareh sak kurang berkenan lek ate tiang pelungguh sami. Lek acare muhadoroh niki tiang cobak sampean sopok pidato sak tiang beng judul “BEREMBE NTAN TIANG PELUNGGUH JARI DENGAN ISLAM SAK KREATIF”.

Alhamdulillah tiang pelungguh sami lahir jari dengan islam, lahir elek dengan-dengan sak beriman jok Allah ta’ale, ye sak patut tiang pelungguh syukuri. Terus mangkin pelungguh sami bergaul irup kance dengan sak nyatean diri’ beriman jok Allah ta’ale benabi lek deside Muhammad SAW, niki berkah sak luar biase.

Laguk sampunan puas lek napi sak mut idap mangkin. Sak arak iman niki sampun berombok sampun bekurang. Jari, sebagai manusie sak beriman daet berakal berembe ntan tiang pelungguh sami jagak sak aran keimanan tiang pelungguh aden sak nenten bekurang. Salak spook ntan tiang jagak, sembahyang, bedo’e daet amalan napi sak maukt lek pengajian.

Lamun tiang pelungguh pelajari manik Allah ta’ale, manusie niki sampun tepinak sesempurne mahluk. Bedoe akal pikiran, bedoe awak sak solah, bedoe intuisi marak pembaos pakar psikologi, niki jari modal tiang pelungguh terus tingkatan keimanan jok deside Allah swt. Dengan sak irupn teisik sik pegawean sak solah ye bagian care jagak keimanan. Dengan sak jagak keimanan niki baunte sebut sebagai dengan sak kreatif. Kembekne tiang bebaos marak nike ? sengak dengan ite befikir untuk kemajuan, gawek pegawean sak bermanfaat merupakan bagian sak paling mahel dalem rombok keimanan.

Dengan kreatif bede daet dengan sak males. Dengan sak besemanget bede daet dengan sak tetep nyebeng, mengkerut daet abot gawek napi-napi. Dengan sak befikir kreatif sebagian lek ciri muslim sak jati. Berembe ntan tiang pelungguh munculan sikap kreatif niki?

Pertame : pasang niat, napi sakte gawek jari amal ibadah. Dengan sak befikir menike yan temudahan lek segale sak sulit.

Kedue : befikir positif, napi yakte gawek aden sak bermanfaat jok tiang pelungguh mesak daet dengan lain.

Ketelu : gawek pegawean sak inovatif, maksudne teruste yak befikir napi sak yakte gawek aden sak lebih solah lek sak wah arak.

Keempat : sampunan tiang pelungguh merase tao muk sombong se wah tiang pelungguh selesaian pegawean nike.

Lamun keempat syarat sak baruk bau tiang pelungguh laksanean silak te pade bareng-bareng gawek, pade pikiran napi kreasi tiang pelungguh.

Dengan kreatif lek hadapan Allah niki sanget teistimewean, kretif pinak barang-barang atau suasane aden sak solah, marak manik deside nabi إن الله جميل يحب الجمال Allah nike solah muk demen lek barang sak solah.

Tiang harepan setelah acare niki, pade rembuk berembe ntan adente sak terus maju muhadoroh niki, lebih bagus daet lebih kreatif. Lamun acare sampun tetata solah, Bapak Kepale seneng, ustaz ustazah seneng, selapuk siswa siswi tehibur.

Sekedar niki sak tiang bau sampean jok pelungguh sami. Lamun arak uni kance sak salak semate mate dateng elek tiang mesak, laguk lamun arak uni kance sak solah mudah-mudahan nike petunjuk elek deside Allah SWT aden sak te laksanean jari pedoman irup.

وَأَخِيْرًا اَقُوْلُ لَكُمْ اُوْصِيْكُمْ وَنَفْسِىْ بِتَقْوَى اللهِ. السَّلاَمُ عَلَيْكُمْ وَرَحْمَةُ اللهِ وَبَرَكاَتُهُ.

Makrip  ( Humas )